UMSÆKJENDUR UM ALÞJÓÐLEGA VERND - Fræðsludagur
-ÁSKORANIR OG TÆKIFÆRI-
Hagnýtar upplýsingar
Þann 17. febrúar 2021 býðst starfsfólki Landspítala að taka þátt í fjölbreyttri fræðsludagskrá sem verður streymt á Facebook síðu Landspítala. www.facebook.com/landspitali
Um 80 milljónir manna eru á flótta í heiminum í dag samkvæmt tölum frá Flóttamannastofnun Sameinuðu þjóðanna. Langflestir eru að flýja átök og leið sumra þeirra liggur til Íslands. Á síðasta ári bárust Útlendingastofnun 654 umsóknir um alþjóðlega vernd á Íslandi, heldur færri en árin á undan. Fækkun umsókna má að einhverju leyti skýra með heimsfaraldri Covid 19.
Umsækjendur um alþjóðlega vernd eru meðal viðkvæmustu skjólstæðinga sem sækja þjónustu á Landspítala og þarfir þeirra eru oft flóknar, bæði í heilsufarslegu og félagslegu tilliti.
Nefnd um málefni umsækjenda um alþjóðlega vernd á Landspítala hefur starfað síðan 2018. Hana skipar starfsfólk frá ýmsum sviðum Landspítala. Nefndin var stofnuð vegna ákalls frá starfsfólki spítalans sem fannst það vanta þekkingu, verkferla og úrræði í starfi sínu þegar kom að því að sinna þessum hópi.
Verkefni nefndarinnar voru m.a. að leggja fram tillögur að stefnu spítalans í málaflokknum, útbúa og samhæfa verkferla, greina þarfir fyrir þjónustu, fræðslu og stuðning og efna til samstarfs við aðrar stofnanir sem annast málefni umsækjenda um alþjóðlega vernd.