Starfseiningar og stjórnendur á fjármálasviði

Fjórar starfseiningar eru á nýju fjarmálasviði Landspítala og ráðið hefur verið í stöður stjórnendur þeirra.

12.10.2009

Ráðnir hafa verið fjórir stjórnendur á fjármálaviði Landspítala sem varð til við endurnýjun á skipulagi spítalans vorið 2009.

Skipurit fjármálasviðs (pdf)

	Hag- og upplýsingamál María Heimisdóttir hefur verið ráðin yfirmaður hag- og upplýsingamála. María ber ábyrgð á söfnun, úrvinnslu og miðlun upplýsinga um starfsemi og rekstur Landspítala, uppbyggingu vöruhúss gagna, útgáfu starfsemisupplýsinga spítalans, þróun og innleiðingu framleiðslumælikvarða, hagmálum og áætlanagerð og hefur umsjón með þróun fjárhagskerfa. María, læknir og doktor í lýðheilsu, hefur starfað á Landspítala í mörg ár. Frá 1. júní 2006 hefur hún starfað sem sviðsstjóri á hag- og upplýsingasviði.
	Innkaup og vörustjórnun Halldór Ó. Sigurðsson hefur verið ráðinn yfirmaður innkaupa og vörustjórnar í fjarveru Valgerðar Bjarnadóttur sem nú situr á alþingi. Halldór ber ábyrgð á útboðum og samningum um innkaup fyrir hönd Landspítala, vörustjórnun og rekstri birgðastöðvar. Halldór starfaði um skeið hjá Ríkiskaupum við innkaup, fyrirspurnir og útboðsmál fyrir ýmis ríkisfyrirtæki. Jafnframt stjórnaði hann til margra ára innkaupum hjá Osta- og smjörsölunni á ýmsum aðföngum, tækjum til rannsókna og vélum fyrir mjólkursamlögin um allt land. Halldór er viðskiptafræðingur (cand.oecon.) og rekstrarhagfræðingur (cand.merc.(M.Sc)).
	Fjárstýring og innheimta Sigrún Guðjónsdóttir hefur verið ráðin yfirmaður fjárstýringar og innheimtu. Sigrún ber ábyrgð á verkefnum fjárstýringar, gjaldskrármálum og innheimtu krafna frá birgjum. Sigrún er viðskiptafræðingur (cand.oecon.) og hefur starfað á Landspítala til margra ára bæði sem deildarstjóri og sviðsstjóri á fjármálasviði.
	Reikningshald Rúnar Bjarni Jóhannsson hefur verið ráðinn yfirmaður reikningshalds. Rúnar ber ábyrgð á verkefnum fjárhagsbókhalds, bókhaldi innri viðskipta og birgðahalds, reikningsskilum og mánaðaruppgjörum. Rúnar Bjarni er rekstrarhagfræðingur MSc og löggiltur endurskoðandi. Hann hóf störf við innri endurskoðun á Landspítala 1. okt. 2003. Frá 1. júní 2006 hefur Rúnar starfað sem sviðsstjóri á fjármálasviði.