Leit
Loka

Stjórnarnefnd ályktar um álit umboðsmanns Alþingis

Stjórnarnefnd LSH ályktaði á fundi sínum fimmtudaginn 8. febrúar 2007 um álit umboðsmanns Alþingis vegna kvörtunar þriggja yfirlækna á Landspítala - háskólasjúkrahúsi yfir skipuriti sjúkrahússins og starfslýsingum sviðsstjóra lækninga á LSH.

Prentað af vef Landspítala - háskólasjúkrahúss
Stjórnarnefnd LSH ályktar um álit umboðsmanns Alþingis

Ályktun stjórnarnefndar Landspítala - háskólasjúkrahúss
8. febrúar 2007

"Stjórnarnefnd LSH fjallaði í dag um álit umboðsmanns Alþingis vegna kvörtunar þriggja yfirlækna á Landspítala - háskólasjúkrahúsi um stöðu og ábyrgð yfirlækna spítalans.

Stjórnarnefndin fagnar fram komnu áliti sem skýrir stjórn og stöðu stjórnenda innan sjúkrahússins. Staðfest er að stjórnendur sjúkrahússins hafa í öllum meginatriðum farið að lögum og fyrirmælum við val sviðsstjóra hvað varðar starfslýsingar og umboð þeirra.

Stjórnarnefnd hvetur framkvæmdastjórn spítalans til að kynna starfsmönnum niðurstöður álitsgerðarinnar og vinna að breytingum á starfslýsingum og erindisbréfum sviðsstjóra til samræmis við álit umboðsmanns, einkum er varðar samræmingu orðalags starfslýsinga og framkvæmdar.

Þá hvetur stjórnarnefnd til þess að starfslýsingar yfirlækna verði endurskoðaðar þannig að öll tvímæli séu tekin af um valdsvið þeirra hvað starfs- og ábyrgðarsvið varðar. Í því sambandi er vert að hafa í huga ákvæði læknalaga og laga um heilbrigðisþjónustu.

Stjórnarnefnd LSH óskar eftir því að framkvæmdastjórn taki tillit til þeirra ábendinga sem koma fram um auglýsingu starfa innan spítalans. Á þetta m.a. við um störf yfirlækna og óskar stjórnarnefndin eftir yfirliti yfir hverjir núverandi yfirlækna sitja í auglýstum stöðum.