Fyrsta útgáfa viðbragðsáætlunar vegna CBRNE atvika er tilbúin. Undir þau flokkast atvik er varða lýðheilsuógnir af völdum efnamengunar, sýkla og geislunar.
Útgefandi: Sóttvarnalæknir og Ríkislögreglustjórinn - almannavarnadeild.
Eitrunarmiðstöð Landspítala er í ritstjórn viðbragðsáætlunar vegna CBRNE atvika ásamt fulltrúum þeirra stofnana er helst sinna verkefnum og samhæfingu þegar slík atvik verða; Sóttvarnalæknir, Almannavarnadeild ríkislögreglustjóra, Mannvirkjastofnun, Matvælastofnun, Umhverfisstofnun, Geislavarnir ríkisins og Veðurstofa Íslands. Fjölmargir aðrir komu að gerð áætlunarinnar, skráðu gátlista fyrir sínar einingar og sinntu yfirlestri.
Innleiðingarferli áætlunar hefst í október 2019 og því verki mun ljúka í janúar 2020. Kynningar verða haldnar í öllum lögregluumdæmum á næstu vikum í samráði við lögreglustjóra, slökkviliðsstjóra, umdæmis- og svæðislækna sóttvarna og aðra hlutaðeigandi viðbragðsaðila.
Markmið áætlunarinnar er að auka almenna og sérhæfða þekkingu á atvikum af þessum toga og tryggja þannig hnökralaus viðbrögð í þeim tilgangi að lágmarka áhrif smits/mengunar/geislunar og annarra óvæntra atvika og vernda þannig lýðheilsu og umhverfi.
Áætlunin var unnin samkvæmt 12 kafla sniðmáti almannavarnadeildar Ríkislögreglustjóra er varðar útlit og uppsetningu viðbragðsáætlana. Viðbragðsaðilar geta unnið samkvæmt eigin gátlistum í 8. kafla viðbragðsáætlunar án þess að til virkjunar komi. Þá gerir áætlunin ráð fyrir að virkja megi aðrar áætlanir samhliða þessari áætlun, sem dæmi má nefna viðbragðsáætlanir heilbrigðisstofnana, viðbragðsáætlanir sóttvarna á landamærum, hópslysaáætlanir almannavarna og viðbragðsáætlanir sveitarfélaga vegna mikilvægra innviða.
Samhliða gerð áætlunarinnar var unnið að gerð Handbókar CBRNE fyrir viðbragðsaðila á vettvangi en það eru slökkvilið, heilbrigðisstarfsmenn, lögregla og björgunarsveitir. Bókin verður gefin út á prenti í lok þessa árs og á nýju ári í Appi fyrir snjallsíma og fartölvur.
CBRN: Skammstöfun fyrir efni, sýkla og geislavirk efni (Chemical, Biological, Radiological, Nuclear, Explosives), sem geta valdið lýðheilsuógn vegna slysa eða vegna hryðjuverka.
Viðbragðsáætlun vegna CBRNE atvika, útg. 1.0