Lionsklúbburinn Fjörgyn hefur endurnýjað stuðningssamning við fyrirtækin N1 hf. og tryggingafélagið Sjóvá hf. um rekstur tveggja bíla sem klúbburinn færði barna- og unglingageðdeild Landspítala, BUGL, að gjöf fyrir nokkrum árum til að nota fyrir skjólstæðinga sína. Samningurinn var undirritaður 7. febrúar 2017.
Bílarnir tveir hafa nýst afar vel í starfi BUGL. Stærri bíllinn er 9 manna og notaður til þess að fara með krakkana í hinar ýmsu ferðir en sá minni er fyrir vettvangsteymi sem fara heim til fjölskyldna og vinna með börnin í nærumhverfi. Á haustmánuðum 2015 voru bifreiðarnar endurnýjaðar með Renault Clio og Renault Traffic bifreiðum.
„Þakklæti starfsfólks og vissan um að bílarnir eru nær ómissandi í því góða starfi sem BUGL vinnur er okkur næg umbun og það er alltaf af mikilli gleði sem við leggjum okkur fram í stuðningi við þau“, segja Lionsmennirnir í Fjörgyn.
Fjörgynjarmenn hafa stutt við BUGL í 14 ár með margvíslegum hætti og ber þar hæst rekstur bifreiðanna tveggja. Þeir voru teknir á rekstrarleigu hjá Íslandsbanka í desember 2007 til þriggja ára og þegar sá samningur rann út keypti klúbburinn þá og færði BUGL að gjöf. Með fjáröflun og stuðningi frá Sjóvá og N1 hefur Lionsklúbburinn Fjörgyn rekið bílana síðan.
Með samningi 22. nóvember 2013 tryggðu Fjörgynjarmenn sér áframhaldandi stuðning Sjóvár og N1 við rekstur BUGL bílanna. Sjóvá leggur til ábyrgðar- og kaskótryggingu og N1 eldsneyti á þá. Nú er verið að endurnýja samstarfssamninginn við Sjóvá og N1 til næstu þriggja ára.
Í Lionsklúbbnum Fjörgyn er fjögurra manna hópur sem gengur undir nafninu „litla BUGL nefndin“. Á henni hvílir mikið starf varðandi stuðninginn við barna- og unglingageðdeildina. Tónleikanefnd Fjörgynjar skipuleggur árlega aðventustórtónleika í Grafarvogskirkju þar sem margir af bestu tónlistarmönnum þjóðarinnar gefa vinnu sína í þágu málefnisins. Stuðningur Fjörgynjarmanna við BUGL birtist í mun fleiru en bílarekstrinum. Hér eru nokkur dæmi um það sem þeir hafa fært starfseminni við Dalbraut:
Tveir skjávarpar og sýningartjöld
Flatskjár og ferðatölvur
Stór og öflug kaffivél
Fullkomið mynd- og hljóðupptökutæki sem notað er í viðtölum til greiningar eftir á
Húsgögn í fjölskylduherbergi
Ipad spjaldtölvur
Húsgögn í útigarðinn
Sérsmíðað fundarborð á legudeild
Íslandskort