Niðurstöður könnunarinnar eru mælikvarði á og samanburður um frammistöðu ríkisstofnana í starfsánægju, stjórnun, starfsanda, jafnrétti, launakjörum, vinnuskilyrðum, sveigjanleika og sjálfstæði í starfi.
Umsjón með „Stofnun ársins“ hefur Gallup en bakhjarl verkefnisins er fjármála- og efnahagsráðuneytið. Samkvæmt ákvörðun framkvæmdastjórnar Landspítala verður könnunin lögð fyrir alla starfsmenn spítalans að þessu sinni. Niðurstöður verða kynntar í maí 2017 en könnunin verður send út í lok febrúar.
„Við tökum nú þátt í fyrsta skipti í kjölfar þess að Landspítala var boðið að fá greinanlegar niðurstöður fyrir nánast allar starfseiningar okkar. Nytsemin af þeirri greiningu verður mikil og mun hjálpa okkur við að bæta starfsumhverfið á Landspítala, með raunhæfum og réttum samanburði. Við ætlum að verða einn besti vinnustaður landsins og mælingar af þessu tagi eru áríðandi hluti af þeirri vegferð. Það er mikilvægt að sem flest starfsfólk taki þátt, þar sem það tryggir gagnsemi og trúverðugleika könnunarinnar,“ segir Ásta Bjarnadóttir, framkvæmdastjóri mannauðssviðs Landspítala.