Miðmætissýkingar geta verið lífshættulegar, sérstaklega ef sýkingin breiðir úr sér í nálæg líffæri og djúpt í bringubeinið. Í Evrópu og Norður-Ameríku er tíðni þessra sýkinga víðast um 2-4% en hefur verið undir 1% hér á landi um nokkurt skeið, hefur lækkað úr 2,5% á rúmum áratug. Auk þess hefur enginn íslenskur sjúklingur látist úr miðmætissýkingu eftir hjartaðgerð síðan svokölluð sogsvampsmeðferð (negative-pressure suction therapy) var tekin upp hér á landi haustið 2005. Svampi er komið fyrir í sárinu og hann tengdur við sog en við þessar aðstæður er vöxtur baktería heftur, þar sem þær þola illa neikvæðan þrýsting, og sárinu haldið hreinu.
Niðurstöður rannsókna á góðum árangri sogsvampsmeðferðar hér á landi hafa verið birtar í erlendum vísindaritum og þær nýttar í doktorsritgerð við Háskóla Íslands.