Davíð O. Arnar hefur verið ráðinn yfirlæknir hjartalækninga frá 11. október 2016 til næstu fimm ára. Davíð hefur verið settur yfirlæknir hjartalækninga undanfarna 18 mánuði en nú hefur verið skipað í stöðuna að undangengnu ráðningarferli. Tveir umsækjendur voru um starfið.
Davíð er sérfræðingur í lyflækningum, hjartalækningum og heilbrigðisstjórnun. Hann lauk embættisprófi í læknisfræði frá Háskóla Íslands og sérfræðinámi í lyflækningum, hjartalækningum og raflífeðlisfræði hjartans við University of Iowa Hospitals and Clinics í Iowa City í Bandaríkjunum. Þá hefur hann lokið doktorsprófi í læknisfræði frá Háskóla Íslands og meistaraprófi í stjórnun heilbrigðisþjónustu og lýðheilsu frá Háskólanum í Reykjavík.
Davíð hefur yfirgripsmikla stjórnunarreynslu en hann var yfirlæknir bráðamóttöku Landspítala Hringbraut frá 2001-2010, yfirlæknir Hjartagáttar frá 2010-2013 og settur yfirlæknir hjartaþræðinga frá 2012-2013. Þá var Davíð framkvæmdastjóri lyflækningasviðs frá 2013-2014.
Davíð hefur verið virkur á sviði vísindarannsókna og snúa rannsóknir hans að mestu um hjartsláttartruflunina gáttatif. Hann hefur birt fjölmargar greinar um erfðafræði og faraldsfræði gáttatifs auk þess sem hann hefur rannsakað áhrif þessa kvilla á heilann.
Davíð O. Arnar er formaður Félags íslenskra lyflækna og situr í nefndum á vegum Evrópusamtaka hjartalækna.