Leit
Loka

Nýtt hjartaþræðingartæki í notkun á Landspítala

Nýtt hjartaþræðingartæki í notkun á Landspítala
Nýtt hjartaþræðingartæki var formlega tekið í notkun á Landspítala 13. maí 2016. Með því er verið að endurnýja tæki sem var tekið í notkun árið 2001 og var því orðið 15 ára. 

Þetta er annað hjartaþræðingartækið sem er tekið í notkun á spítalanum á síðustu þremur árum. Allnokkrar endurbætur hafa einnig verið á húsnæði hjartaþræðingardeildar undanfarið. Aðstaðan þar er nú orðin mjög góð og fyllilega sambærileg við aðstöðu hjá þeim norrænu sjúkrahúsum sem Landspítali ber sig helst saman við. 

Fjölbreytt notkun og stytting biðlista 

Þræðingartækni hefur á undanförnum árum orðið stöðugt mikilvægari í greiningu og meðferð hjartasjúkdóma. Nýja tækið á ekki síst eftir að koma vel að gagni við fjölþætt inngrip vegna hjartsláttartruflana. Til þeirra teljast meðal annars brennsluaðgerðir, gangráðsísetningar og bjargráðsaðgerðir. Talsvert vaxandi eftirspurn hefur verið eftir brennsluaðgerðum vegna gáttatifs og biðlisti þar er mjög langur. Nýja þræðingartækið kemur sér vel við að stytta þennan biðlista. Auk meðferðar við hjartsláttartruflunum verður nýja hjartaþræðingartækið notað í kransæðaþræðingum, kransæðavíkkunum og við að koma fyrir ósæðarhjartalokum. 

Gjafa- og styrktarsjóður Jónínu S. Gísladóttur gerir Landspítala kleift að kaupa hjartaþræðingartækið en sjóðurinn hefur reynst hjartadeild Landspítala öflugur bakhjarl undanfarin ár, ekki síst við kaup á dýrari tækjum. 

Umsögn

Davíð O. Arnar, yfirlæknir hjartalækninga
Ingibjörg Jóna Guðmundsdóttir, yfirlæknir hjartaþræðinga 
,,Við viljum þakka Jónínusjóðnum fyrir ómetanlegan stuðning við hjartadeildina í gegnum árin, hann hefur verið mikilvægur í uppbyggingu á tækjakosti í hjartalækningum. Landspítali verður að vera samkeppnishæfur hvað varðar aðstöðu og tækjakost til að laða að sérfræðimenntað starfsfólk. Á stuttum tíma hefur nú tekist að stórbæta vinnuaðstöðuna á hjartaþræðingardeildinni. Það er liður í markvissri uppbyggingu sem hefur átt sér stað á hjartadeild Landspítala og enn eitt skrefið í því að bæta þjónustuna við hjartasjúklinga."

 

Mynd:  Nýtt hjartaþræðingartæki tekið í notkun á Landspítala 13. maí 2016. Magnús Pétursson, fyrrverandi forstjóri Landspítala og stjórnarmaður í Gjafa- og styrktarsjóði Jónínu S. Gísladóttur, Páll Matthíasson, forstjóri Landspítala, Jón Gísli Pálmason, sonur Jónínu, Sigfús Ingimundarson, endurskoðandi Jónínusjóðsins, Sigfús Örn Gizurarson sérfræðilæknir í hjartaþræðingu, Ingibjög Jóna Guðmundsdóttir, yfirlæknir hjartaþræðinga og Karl Andersen, yfirlæknir í hjartalækningum.