Caritas Ísland afhendir styrk til Laugarássins meðferðargeðdeildar

 

Þessi  styrkur verður nýttur til að efla fræðslu- og kynningarstarf á starfseminni og þeim úrræðum sem Laugarásinn meðferðargeðdeild býður upp á. Styrkurinn er lyftistöng fyrir framþróun og áframhaldandi uppbyggingu á starfsemi Laugarássins og voru fulltrúum Caritas Ísland færðar bestu þakkir starfsfólks við afhendinguna.

Sigríður Ingvarsdóttir, formaður Caritas Ísland,
sagði meðal annars við afhendinguna:

„Allir geta þurft að glíma við geðsjúkdóm einhvern tíma á ævinni. Markmiðið með  styrktartónleikum Caritas er að vekja fólk til meðvitundar um málefni geðfatlaðra á Íslandi. Það veit nefnlega enginn hver getur verið næstur. Geðsjúkdómar geta lagst á alla og hver sem er getur þurft að glíma við einhvers konar geðsjúkdóm á ævi sinni. Margir eru enn haldnir fordómum gagnvart sjúkdómnum. Sennilega hafa fáir sjúklingar orðið jafn illa fyrir barðinu á fordómum og fólk sem þjáist af geðsjúkdómum. Fordómar eru skoðanir sem ekki eru byggðar á rökum eða þekkingu heldur er þeim slegið fram án þess að sannleiksgildi þeirra hafi verið kannað. Það er því mikilvægt að vinna gegn fordómum um geðsjúkdóma. Það þarf meiri fræðslu, umræðu og forvarnir. Og það þarf að búa betur að aðstandendum. Það þarf enginn að skammast sín fyrir að vera með hjartasjúkdóm og enginn þarf að skammast sín fyrir að þjást af geðsjúkdómi.“

Mynd: Fulltrúar Caritas Ísland afhenda Laugarásnum meðferðargeðdeild ágóða styrktartónleika sem haldnir voru fyrir starfsemina haustið 2015. Helga Margrét Ólafsdóttir, Magnús Ólafsson, Nanna Briem, Sigríður Ingvarsdóttir, Gyða Magnúsdóttir og séra Patrik.