Barna- og unglingageðdeild Landspítala hafa verið afhentar rúmar 170 þúsund krónur sem unglingar í Grafarvogi söfnuðu henni til stuðnings.
Dagana 1. til 6. febrúar 2016 stóðu unglingar og félagsmiðstöðvar Gufunesbæjar í Grafarvogi fyrir góðgerðaviku. Unglingar úr öllum félagsmiðstöðvum Grafarvogs bjóða fram krafta sína ár hvert í góðgerðaráð og sjá um að skipuleggja og velja þann málstað sem safnað er fyrir. Í ár var það BUGL.
Haldið var skemmtikvöld í félagsmiðstöðinni Fjörgyn þriðjudaginn 2. febrúar þar sem þekktir uppistandarar gáfu vinnu sína fyrir málstaðinn en fram komu Ari Eldjárn, Helgi Jónsson, Rökkvi Vésteinsson og Bergvin Oddsson. Aðgangur að kvöldinu var ókeypis en Ölgerðin og Dominos gáfu veitingar sem seldar voru til styrktar BUGL.
Góðgerðavikunni lauk með „góðgerðaballi“ í félagsmiðstöðinni Sigyn þar sem Steinar, Glowie og Áttan skemmtu yfir 200 unglingum fram eftir kvöldi.
Mynd: Unglingar í Grafarvogi söfnuðu fé til styrktar BUGL. Sara Líf Valsdóttir og Guðrún Pálsdóttir afhentu féð fyrir hönd góðgerðarráðs félagsmiðstöðva í Grafarvogi