Viðbrögð við náttúruhamförum og afmælishátíð á 112 deginum 11. febrúar

Aðstandendur 112 dagsins fræða almenning um almannavarnir og er sérstök áhersla lögð á að fjalla um viðbúnað og viðbrögð almennings við náttúruhamförum á borð við jarðskjálfta og óveður. Þetta verður gert meðal annars á samfélagsmiðlum og í 112 blaðinu sem fylgir Fréttablaðinu í dag. Þar er m.a. fjallað um viðbrögð Landspítala við hópslysum. 

112 dagurinn er samstarfsverkefni stofnana og félagasamtaka sem annast margvíslega neyðarþjónustu, almannavarnir og barnavernd í landinu. Þau eru 112, Barnaverndarstofa, Embætti landlæknis, Heilsugæsla höfuðborgarsvæðisins, Landhelgisgæslan, Landspítali, Landssamband slökkviliðs- og sjúkraflutningamanna, Mannvirkjastofnun, Rauði krossinn, Ríkislögreglustjórinn, Slysavarnafélagið Landsbjörg, Slökkvilið höfuðborgarsvæðisins, Vegagerðin og samstarfsaðilar um allt land. 

20 ára afmælishátíð Neyðarlínunnar 112 kl. 16 í dag 

Neyðarlínan fagnar 20 ára afmæli um þessar mundir. Þann 1. janúar síðastliðinn voru liðin 20 ár síðan samræmda, evrópska neyðarnúmerið 112 var tekið í notkun hér á landi. Það leysti af hólmi 146 mismunandi númer viðbragðsaðila sem almenningur notaði til að leita eftir aðstoð, allt eftir því hvar fólk var statt og hvers eðlis þörfin fyrir aðstoð var hverju sinni.  Tvítugsafmælinu verður fagnað við athöfn í bílageymslu Slökkviliðs höfuðborgarsvæðisins í Björgunarmiðstöðinni Skógarhlíð kl. 16:00 í dag, fimmtudag. 

Dagskrá
Ávarp: Ólöf Nordal innanríkisráðherra
Kvennakórinn Katla
Verðlaun í Eldvarnagetrauninni 2015 afhent
Gamanmál: Ari Eldjárn
Skyndihjálparmaður Rauða krossins útnefndur