Forstjórapistill: Vinnustofa um meðferðarkjarnann skilar hugmyndum í fullnaðarhönnunina
Fyrir þá sem starfa og fá þjónustu á Landspítala Hringbraut fer ekki á milli mála að uppbygging er hafin. Verið er að grafa fyrir sjúklingahóteli og húsi fyrir jáeindaskanna. Samhliða höfum við að undanförnu unnið hörðum að undirbúningi fyrir lokahönnun meðferðakjarnans sem rís við Hringbraut. Við erum komin á fleygiferð til framtíðar!
Öflugur hópur samstarfsfólks tók þátt í gríðarmikilli og skemmtilegri vinnu sem Chris Backous frá Virgina Mason vann með okkur nú, eins og fyrri vinnustofum. Við höfum notað aðferðir 3P (Production, Preparation, Process) þar sem flæði og þjónusta við sjúklinga er í forgrunni. Með þessari aðferð veitist okkur auðveldara að sjá út fyrir okkar eigin rann og horfa á heildarsamhengi starfseminnar. Öryggi sjúklinga og gæði þjónustunnar er í algjörum forgrunni. Það hefur verið mikill kraftur og gleði í þessari vinnustofu eins og hinum fyrri. Það má skýrt sjá í meðfylgjandi myndbandi. Hundruðir starfsmanna hafa komið að þessari vinnu ásamt sérfræðingum og haghöfum utan spítalans; fulltrúum sjúklinga og hönnuðum frá CORPUS. Nú þegar við afhendum hönnuðum CORPUS vinnu okkar til fullnaðarhönnunar vil ég nota tækifærið og þakka öllum sem komið hafa að þessari frábæru og lærdómsríku vinnu. Að ná að hanna húsnæði utan um besta vinnulag er einstakt tækifæri sem nýta verður til fulls. Vinnan mun heldur ekki bara nýtast við hönnun meðferðarkjarnans heldur er margt sem við getum nýtt okkur strax. Má þar nefna aukna þjónustu stoðsviða við bráðadeildir en tilraunaverkefni um slíkt er þegar hafið á hjartadeild við góðan orðstír.
Okkur veitir ekki af stöðugt nýjum og ferskum hugmyndum um flæði sjúklinga. Auðvitað skiptir miklu staða úrræða utan spítalans en heilbrigðisráðherra hefur falið okkur og fleirum að vinna með ráðuneytinu að málinu. Við höfum tekið ákvörðun um að opna endurhæfingardeild á Landakoti í mars, endurhæfingarrýmum á Eir hefur verið fjölgað og fleiri verkefni verða kynnt innan skamms. Samhliða horfum við sífellt í okkar eigin ferla og leitum lausna sem eru stundum nærtækari en okkur gæti grunað.
Að lokum langar mig til að nota tækifærið og óska kollegum okkar og vinum á Sjúkrahúsinu á Akureyri innilega til hamingju en Sjúkrahúsið á Akureyri hlaut nú í vikunni alþjóðlega gæðavottun á starfsemi sinni. Ekki einasta er SAk fyrst heilbrigðisstofnana á Íslandi til að hlotnast þessi heiður heldur skýtur sjúkrahúsið öllum á Norðurlöndum ref fyrir rass. Þetta er til mikillar fyrirmyndar og ber frábæru starfi starfsfólks og stjórnenda gott vitni.
Hafið það gott um helgina hvort heldur þið standið vaktina eða hlaðið batteríin!
Páll Matthíasson