Páll Matthíasson, forstjóri Landspítala, tók 12. janúar 2016 fyrstu skóflustungu að húsnæði fyrir jáeindaskanna á spítalanum. Íslensk erfðagreining færði íslensku þjóðinni skannann að gjöf sem og allan tilheyrandi tækjakost og sérhæft húsnæði undir hann. Verðmæti gjafarinnar er rúmar 840 milljónir króna.
Flókinn og umfangsmikill búnaður fylgir skannanum, svo sem öreindahraðall sem framleiðir geislavirk efni sem leita í sjúka vefi líkamans. Jáeindaskanni er oftast notaður í krabbameinsmeðferðum en hann er einnig hægt að nýta í tauga-, hjarta- og gigtlækningum.
Húsnæðið verður byggt á Landspítala Hringbraut, aðlægt skyldri starfsemi til að ná sem mestri skilvirkni og þægindum fyrir sjúklinga. Gert er ráð fyrir að það verði tilbúið í september en þá verður skannanum og búnaði komið fyrir og hann prufukeyrður.
Áætlað er að jáeindaskanninn verði kominn í notkun um næstu áramót.
Bylting í greiningu sjúkdóma
Jáeindaskanni hefur ekki verið til á Íslandi en nýr skanni mun valda byltingu í greiningu og meðferð sjúkdóma. Árlega hafa um 200 sjúklingar farið í jáeindaskanna til Danmerkur en áætlað er að um 2.000 manns muni fara í skannann hér á landi á ári hverju. Jáeindaskanni gefur nákvæmar upplýsingar um staðsetningu og dreifingu krabbameina. Með slíkar upplýsingar er hægt að gera geislameðferð markvissari og fækka óþarfa skurðaðgerðum. Skanninn mun gefa betri upplýsingar um útbreiðslu sjúkdóma hjá um þriðjungi sjúklinga og þar af leiðandi breyta meðferð þeirra töluvert. Með markvissari meðferð minnka aukaverkanir og batahorfur aukast. Að auki verður hægt að greina hvernig sjúkdómar bregðast við meðferð og því hægt að grípa fyrr inn í ef breyta þarf meðferðinni. Jáeindaskanninn á líka eftir að nýtast vel við rannsóknar- og vísindastarf á Íslandi en slíkur skanni er talinn sjálfsagður við rannsóknir marga sjúkdóma.
Myndir: Fyrsta skóflustunga að jáeindaskannahúsi á Landspítala Hringbraut 12. janúar 2016.Kári Stefánsson, forstjóri Íslenskrar erfðagreiningar og Páll Matthíasson, forstjóri Landspítala -