Þrír nýir sérfræðingar í hjúkrun á lyflækningasviði

Þrír nýir sérfræðingar í hjúkrun hafa tekið til starfa á lyflækningasviði Landspítala

Bryndís S. Halldórsdóttir lauk BS prófi í hjúkrun frá HÍ 1981, MS prófi 2009 og hlaut sérfræðingsréttindi 2013.  
Bryndís hefur starfað við hjúkrun frá útskrift á Landspítala, við heimahjúkrun og í heilsugæslu en frá 1997 á LSH við hjúkrun lungnasjúklinga með áherslu á hjúkrun sjúklinga með svefntengdar öndunartruflanir og heimaöndunarvélar. Bryndís hefur verið virk í félagsstörfum lungnahjúkrunarfræðinga og m.a. verið formaður fagdeildar þeirra innan félags íslenskra hjúkrunarfræðinga.

 

Elfa Þöll Grétarsdóttir útskrifaðist vorið 2002 með BS próf frá HÍ og lauk meistarnámi frá University of Wisconsin 2006. Hún hefur starfað á ýmsum öldrunarlækningadeildum á Landspítalanum frá 2010, var í starfsnámi til sérfræðiréttinda 2011-2013 og fékk starfsleyfi sem sérfræðingur í öldrunarhjúkrun 2013. Elfa lagði sérstaka áherslu á líknar- og lífslokameðferð í námi sínu. Hlutverk Elfu sem sérfræðingur á Landspítala verður ráðgjöf og fræðsla þvert á deildir spítalans varðandi öldrunarhjúkrun auk þess sem hún mun sérstaklega styðja við hjúkrun á öldrunarlækningadeildum LSH.

 

Ingibjörg Hjaltadóttir lauk BS prófi í hjúkrunarfræði frá Háskóla Íslands 1983 og MS prófi frá hjúkrunarfræðideild Háskóla Íslands árið 2001. Hún stundaði doktorsnám við heilbrigðisvísindadeild læknadeildar Háskólans í Lundi og varði þar doktorsverkefni sitt 2012. Ingibjörg hefur starfað við Landspítala frá 1983, bæði sem hjúkrunarfræðingur og stjórnandi í hjúkrun.  Ingibjörg hefur stundað rannsóknir á sviði öldrunarhjúkrunar og tekið þátt í þverfaglegum rannsóknum á sviði öldrunarfræða.  Hún hefur verið í stýrinefnd um RAI rannsóknir á vegum heilbrigðisráðuneytisins frá árinu 1993 og tekið þátt í Norrænu rannsóknarsamstarfi með notkun RAI mælitækja.  Hún var lektor í hlutastöðu við hjúkrunarfræðideild HÍ á árunum 2003-2010 og er nú í hlutastöðu þar sem dósent auk starfa sinna á Landspítala.