Nýtt hjartaþræðingartæki tekið í notkun á Landspítala

• 21.03.2014

ForsíðufréttirForsíðufréttirGjafir og styrkirLyflækningaþjónustaHjartaþjónustaHjartaþjónustaGjafir og styrkirLyflækningaþjónusta

Nýja tækið hefur marga kosti umfram það gamla, m.a. er minni geislaskammtur notaður við myndatöku, myndgæði eru meiri og tækið er mjög notendavænt. 

Þrjú hjartaþræðingartæki eru nú í notkun á Landspítala og alla jafna unnið á þremur þræðingarstofum samtímis. Tvær eru notaðar fyrir kransæðaþræðingar og ein fyrir raflífeðlisfræðileg inngrip eins og brennsluaðgerðir vegna hjartsláttartruflana og gangráðsísetningar. Starfsemin er umfangsmikil og á þriðja þúsund aðgerðir á ári hverju.

Vakt er á hjartaþræðingastofunni allan sólarhringinn alla daga ársins. Tafarlaus hjartaþræðing með belgvíkkun og stoðnetsísetningu á lokuðu æðinni er nú kjörmeðferð við bráðri kransæðastíflu og þarf því að vera í boði hvenær sem er sólarhringsins. Dánartíðni vegna kransæðastíflu hefur lækkað verulega á þeim áratug síðan þessi vakt var tekin upp. 

Nýja hjartaþræðingatækið, sem kostaði um 150 milljónir króna, er að miklu leyti keypt fyrir gjafafé. Styrkur frá Gjafa- og styrktarsjóði Jónínu S. Gísladóttur átti stóran þátt í því að gera kleift að kaupa tækið. Stuðningur sjóðsins við uppbyggingu hjartalækninga á Landspítala undanfarin ár hefur verið ómetanlegur. Þá hafa sjúklingasamtökin Hjartaheill, sem og Neistinn, styrktarfélag hjartveikra barna, staðið fyrir landssöfnun vegna kaupa á tækinu og í þeim á hjartadeild Landspítala sannarlega hauk í horni.