Inger Helene Boasson, sem var ljósmyndari á Landspítala á árunum 2006 til 2013, gaf spítalanum 30 ljósmyndir þegar hún hætti störfum í júní 2013. Myndunum var valinn staður á heilabilunardeild L4 á Landakoti. Á deildinni eru eingöngu sjúklingar með minnissjúkdóma sem geta lítið sem ekkert hreyft sig frá deildinni nema í fylgd starfsmanna eða aðstandenda. Því er öll tilbreyting kærkomin. Fjöldi myndanna varð til þess að hægt var að setja nýjar skreytingar á gang og setustofu vistmanna.
Flestar ljósmyndanna voru án ramma. Minningargjöf frá ættingjum Ögðu Vilhelmsdóttur (1916-2012) var notuð til að ramma myndirnar inn. Agða var sjúklingur á deildinni og lést þar.
Nýlega var myndunum komið fyrir á nýmálaðri deildinni og merkingar settar við hverja þeirra.
Ljósmyndina fyrir ofan tók Þorkell Þorkelsson, sem tók við af Inger Helene sem ljósmyndari á Landspítala, þegar ættingjar Ögðu komu í heimsókn á deildina. Hjónin Anna Jóhannesdóttir, hálfsystir Ögðu, Tómas Á. Jónasson læknir, mágur, ásamt Þórdísi Jóhannesdóttur, barnabarni þeirra hjóna. Einnig er á myndinni Gerður Sæmundsdóttir, deildarstjóri L-4 á Landakoti.
Að neðan er mynd af Inger Helene í Þórsmerkurferð Starfsmannafélags Landspítala árið 2010.