Starfsfólk kvenlækningadeildar 21A á Landspítala hélt kaffiboð til heiðurs Vilborgu Örnu suðurpólsfara 30. janúar 2013 og þakkaði henni stuðninginn. Vilborg Arna gekk 1.140 kílómetra og safnaði áheitum fyrir Líf, styrktarfélag kvennadeildar LSH. Sérstaklega var safnað fyrir kvenlækningadeildina til að bæta aðbúnað fyrir sjúklinga og aðstandendur þeirra. Nú þegar hafa safnast yfir 13 milljónir króna.
Vilborg hélt úti bloggsíðunni Lífsspor.is og er hún enn opin. Þar deilir Vilborg hugsunum sínum frá ferðalaginu og myndum.
Starfsfólk kvennadeilda lýsti áðdáun sinni á þeim kjarki og þori sem Vilborg Arna hefði og óskaði henni innilega til hamingju með þetta mikla afrek. Við komuna afhenti starfsfólkið henni gjafir, þar á meðal nuddinniskó fyrir lúna fætur! Einnig fékk hún hárvörur en margir hugsuðu til hennar hvernig það hefði eiginlega verið að geta ekki farið í sturtu í 60 daga! Loks fékk hún baknuddtæki og blóm.
Líf, styrktarfélag kvennadeildar, heldur móttöku fyrir Vilborgu Örnu í Hörpunni næstkomandi sunnudag, 3. febrúar, kl. 15:00 og eru allir velkomnir.