Setberg hefur afhent Barnaspítala Hringsins að gjöf 100 titla barnabóka sem munu gleðja unga lesendur á sjúkrahúsinu og hins vegar peningagjöf að fjárhæð ein milljón króna sem verður notuð til þess að kaupa nauðsynlegan tækjabúnað. Tilefni gjafanna er 60 ára afmæli bókaútgáfunnar.
Setberg hefur starfað frá árinu 1952 og er ein elsta bókaútgáfa landsins. Hún hefur verið rekin af Arnbirni Kristinssyni samfellt í 60 ár. Setberg er í eigu Arnbjörns og eiginkonu hans, Ragnhildar Björnsson. Þau afhentu gjöfina á leikstofu Barnaspítala Hringsins fimmtudaginn 1. nóvember 2012.
Fyrstu 50 árin gaf Setberg út alls konar bækur; matreiðslubækur, barnabækur, ævisögur og þýddar bókmenntir. Á síðustu 10 árum hefur Setberg helgað sig eingöngu útgáfu barnabóka.
Alls hefur Setberg gefið út 850 bókatitla.
Ljósmynd: Jón Hilmar Friðriksson, framkvæmdastjóri kvenna- og barnasviðs og hjónin Arnbjörn Kristinsson og Ragnhildur Björnsson.