Heilsuræktaraðstaða World Class fyrir Laugarásveg 71 og Reynimel 55

Fulltrúar World Class heilsuræktarinnar hafa fært Magnúsi Ólafssyni deildarstjóra og starfsmönnum meðferðarheimilisins Laugarásvegi 71 og endurhæfingarheimilisins Reynimel 55 aðgang að heilsuræktaraðstöðu World Class. Aðgangurinn verður til afnota fyrir notendur starfseininganna tveggja og gildir bæði fyrir heilsuræktar- og sundlaugaraðstöðu World Class í glæsilegri heilsuparadís í Laugardalnum. Björn Leifsson framkvæmdarstjóri og Gígja Þórðardóttir sjúkraþjálfari og yfirmaður faglegrar þjálfunar hjá World Class skrifuðu undir samstarfið á Laugarásvegi 71 föstudaginn 23. mars 2007 og var boðið upp á heilsusamlega rétti af þessu tilefni.

Aðgangur að heilsurækt er samstarfsverkefni World Class og starfseininganna tveggja og eru miklar vonir bundar við það. Björn Ásgeir Björgvinsson stuðningsfulltrú hefur umsjón með verkefninu og verður tengiliður við World Class.

Líkamleg virkni er einn fjölmargra þátta sem áhersla er lögð á í starfseiningunum og er þetta verkefni liður í því að efla þann þátt til muna. Framtak World Class heilsuræktarinnar til verkefnisins er einkar veglegt og jafnframt mikilvægt fyrir þróun heilsuræktar og aukinna gæða í öllu endurhæfingarferlinu. Forsvarsmönnum World Class voru færðar innilegar þakkir fyrir framtakið með óskum um farsælt og árangursríkt samstarf.

Mynd: Efri röð: Stígrún Ása Ásmundsdóttir, Björn Ásgeir Björgvinsson, Magnús Ólafsson, Daði Óskarsson og Jenný Níelsdóttir.
Neðri röð: Gígja Þórðardóttir og Björn Leifsson.