Framkvæmdastjórn LSH um álit umboðsmanns Alþingis

"Stjórnkerfi Landspítala - háskólasjúkrahúss stenst lög og reglur og heimilt er að velja sviðsstjóra með þeim hætti sem gert hefur verið á sjúkrahúsinu. Þetta eru megin niðurstöður í áliti umboðsmanns Alþingis vegna kvörtunar þriggja yfirlækna um stöðu og ábyrgð yfirlækna spítalans. Framkvæmdastjórn LSH lýsir yfir ánægju með þessa niðurstöðu sem staðfestir að stjórnskipulag sjúkrahússins, sem ákveðið var við sameiningu sjúkrahúsanna árið 2000, var ekki andstætt lögum, eins og reynt var að fá opinbera viðurkenningu á. Í áliti sínu gerir umboðsmaður Alþingis athugasemdir við orðalag í starfslýsingum sviðsstjóra lækninga varðandi ábyrgð á framkvæmd læknisþjónustu. Eðlilegt er að brugðist verði við þessari athugasemd með endurskoðun starfslýsinga bæði sviðsstjóra og yfirlækna þannig að þar fari ekkert á milli mála varðandi hlutverk.

Meðfylgjandi eru nokkrar tilvitnanir í álit umboðsmanns Alþingis. Álitið er birt í heild á vef umboðsmanns Alþingis, www.umbodsmaduralthingis.is.

· Ég [umboðsmaður] tel að fullnægjandi lagaheimild hafi staðið til þess að skipta starfsemi Landspítala-háskólasjúkrahúss upp í ákveðin svið og fela sérstökum sviðsstjórum að fara með stjórn þeirra í umboði og fyrir framsal verkefna frá forstjóra og framkvæmdastjóra lækninga spítalans. [...]

· [...] samkvæmt 5. mgr. 29. gr. laga nr. 97/1990, um heilbrigðisþjónustu, skulu yfirlæknar á hverri deild, sérgrein eða annarri starfseiningu, bera ábyrgð á lækningum sem þar fara fram. [...] Undir það fellur þó ekki, nema sérstakar ákvarðanir séu teknar um það, fjárhagsleg eða rekstrarleg stjórnun að öðru leyti en því að stuðla að því að starfsemin sé ávallt sem hagkvæmust og markvissust. [...]

· Ég [umboðsmaður] geri í áliti þessu athugasemdir við að orðalag í starfslýsingum sviðsstjóra lækninga, upphaflega frá árinu 2000, sérstaklega um að þeir beri "ábyrgð á [...] framkvæmd læknisþjónustu sviðsins" [...]. Ég beini því þeim tilmælum til yfirstjórnar Landspítala-háskólasjúkrahúss að gerðar verði breytingar á starfslýsingum sviðsstjóra lækninga [...].

· [...] Ég [umboðsmaður] geri ekki athugasemdir við að starfsmenn Landspítala-háskólasjúkrahúss hafi verið valdir til að gegna starfi sviðsstjóra án auglýsingar enda hafi slíkt verið heimilt [...]

· [...] Þá tel ég [umboðsmaður] að yfirstjórn Landspítala-háskólasjúkrahúss hefði í samræmi við vandaða stjórnsýsluhætti þurft að huga nánar og betur að því í tilefni af athugasemdum sem fram komu strax í byrjun árs 2001 hvort efni starfslýsingarinnar samrýmdist að öllu leyti gildandi lagareglum um stjórnskipulag spítalans og þar með talið um lögbundið starfssvið og ábyrgð yfirlækna. [...].