Blóðbankann vantar enn blóð

Alla síðustu daga hefur verið mikil þörf fyrir blóð á Landspítala - háskólasjúkrahúsi. Miklar og flóknar aðgerðir hafa fyrirvaralítið skapað þörf fyrir blóðhluta; rauðkorn, blóðvökva (plasma) og blóðflögur. Síðustu helgi, alla þessa viku og aðfaranótt fimmtudagsins hafa blóðgjafar brugðist vel við kalli starfsfólks Blóðbankans og streymt inn til að gefa blóð. Notkun blóðs síðustu vikuna hefur verið 100% meiri en meðalnotkun blóðs er í venjulegri viku. Nokkrir sjúklingar hafa þurft mikið magn blóðhluta og hefur það kallað á mikla notkun á skömmum tíma.

Til að svara sveiflum í blóðhlutanotkun og tryggja öryggi sjúklinga leitast Blóðbankinn við að eiga u.þ.b. 600 einingar af rauðkornum á lager (í varabirgðum). Þessar varabirgðir jafngilda u.þ.b. 2ja vikna notkun á blóðhlutum. Þegar nokkrir sjúklingar þurfa á nokkrum dögum sem samsvarar rúmlega viku notkun blóðhluta þá skerðast blóðbirgðirnar með afgerandi hætti. Um síðustu helgi voru varabirgðir Blóðbankans komnar niður fyrir 400 einingar af rauðkornum. Í dag eru varabirgðirnar tæplega 500 einingar af rauðkornaþykkni. Markmið Blóðbankans er að ná varabirgðum rauðkorna upp fyrir 600 einingar. Blóðhlutar eru notaðir við allar mikilvæga meðferð á sjúkrahúsum landsins, liðskiptaaðgerðir, kviðarholsaðgerðir, krabbameinsmeðferð,nýburalækningar, barnalækningar, hjartaaðgerðir, æðaskurðlækningar og margt fleira.

Líkt og alltaf á fimmtudögum verður móttaka blóðgjafa opin til kl. 19:00 í dag. Á morgun (föstudag) verður opið frá klukkan 8:00-17:00. Starfsfólk Blóðbankans hvetur alla blóðgjafa sem nú mega gefa blóð, að koma í dag eða á morgun, svo hægt verði að tryggja nauðsynlegar blóðhlutabirgðir. Nú nálgast tímabil jólaundirbúnings og flensur hrjá landsmenn. Oft er því erfiðara að ná til blóðgjafa á þessum árstíma. Núverandi skortur á blóði stafar þó fyrst og fremst af mikilli og skyndilegri þörf mikils blóðs og hafa viðbrögð blóðgjafa verið stórkostleg síðustu viku. Síðasta laugardag komu rúmlega 100 blóðgjafar, og á mánudaginn (25. nóvember) var metdagur í móttöku blóðgjafa við Barónstíg, þegar 200 manns komu í heimsókn. 160 þeirra gátu gefið blóð en 40 manns skráðu sig sem nýja blóðgjafa.

Næstu 2 daga leggur Blóðbankinn mesta áherslu á að fá núverandi blóðgjafa til að koma og gefa blóð, en biður þá sem vilja gerast nýir blóðgjafar að koma í næstu viku, þegar vonandi hefur náðst jafnvægi í blóðbirgðum. Við fyrstu heimsókn blóðgjafa eru tekin blóðsýni til blóðflokkunar og veiruskimunar, nýir blóðgjafar mega síðan koma eftir 2 vikur til að gefa blóð. Í dag eru u.þ.b. 9.000 virkir blóðgjafar á Íslandi. Blóðbankinn vonast auðvitað til að fá fleiri nýja blóðgjafa til að hjálpa, þótt síðar verði, ef brýn þörf skapast fyrir mikið magn blóðhluta á skömmum tíma.

Víða um heim hefur skapast mikill skortur á blóði og blóðgjöfum, annaðhvort tímabundið eða svæðisbundið. Þetta hefur leitt til þess að í Bandaríkjunum hefur oft þurft að fresta valaðgerðum (af biðlistum) um langan tíma. Til slíks hefur aldrei þurft að koma hér á landi og er þar fyrst og fremst að þakka mikilvægu framlagi íslenskra blóðgjafa, sem hafa staðið vel við bakið á Blóðbankanum í starfi hans. Víða í Bandaríkjunum hafa sjúkrahús ekki haft meira en 2ja-3ja daga birgðir blóðs til afnota, meðan á Íslandi hafa verið tiltækar u.þ.b. 2ja vikna birgðir. Þetta er auðvitað mjög mikilvægt hér á landi vegna landfræðilegrar einangrunar landsins sem gerir okkur ekki kleift að kalla eftir blóðhlutabirgðum frá nágrannablóðbanka með engum fyrirvara, eins og hægt er um gjörvallt meginland Evrópu og Bandaríkin. Mikilvægi þess að eiga sterkan hóp blóðgjafa hefur því margsannað gildi sitt á liðnum árum og ekki síst á miklum annatímum líkt og síðasta vika hefur verið.


Blóðbankinn þakkar öllum blóðgjöfum stuðninginn á síðustu vikum.