Bráðamóttaka barna

Bráðamóttaka Barnaspítala Hringsins tekur á móti veikum börnum frá fæðingu til 18 ára aldurs eftir tilvísun frá lækni, hjúkrunarfræðingi eða ljósmóður.
Foreldrar/forráðamenn geta leitað beint á bráðamóttökuna með bráðveikt barn.
Ef barnið hefur lent í slysi eða óhappi og þarf mat heilbrigðisstarfsfólks skal leita á Heilsugæslu eða bráðamóttökuna í Fossvogi.

Til að tryggja öryggi allra sjúklinga þarf að forgangsraða eftir eðli og alvarleika veikinda.

Hjúkrunarfræðingur skoðar og metur alla sem koma á bráðamóttöku strax við komu.  Þegar lagt hefur verið mat á alvarleika veikinda er sjúklingnum vísað í viðeigandi farveg.

Börnum er fylgt eftir með endurkomu á bráðamóttöku eða með símtali, sé þess þörf.

Um 6-7% barna sem leita á bráðamóttökuna eru lögð inn á deildir Barnaspítalans eftir skoðun og rannsóknir.  Þannig fá langflest börn sem koma á móttökuna viðeigandi meðferð þar og fara síðan heim.

Börn undir fjögurra ára eru stærsti hópur þeirra barna sem leitað er með á bráðamóttöku barna.  Álagið er mjög breytilegt og eru árstíðasveiflur miklar. Flestar komur eru yfir vetrarmánuði en þeim fækkar með hækkandi sól. Komur á bráðamóttöku barna eru um 13.500 á ári.

Opið allan sólarhringinn

Aðalinngangur Barnaspítala Hringsins er opinn frá kl. 07:00 til 22:00 virka daga og kl.10:00-22:00 um helgar.

Utan þess tíma er farið inn um næturinngang Landspítala sem snýr að Eiríksgötu.

• Ekki er veitt símaráðgjöf á bráðamóttöku barna

• Almenn símaráðgjöf vegna veikinda barna er veitt á Heilsugæslum og hjá Læknavaktinni

 

 

 

• Börn og unglingar (heildarlisti)
•  Berkjungabólga hjá börnum (RS vírus)
• Iðrasýking hjá barni
• Þvagfærasýking hjá barni